شَغَّال ف إيه ؟؟
صايع يا بِيِه
ضَيَّعْت من عُمْرِىِ السنين
بين الكُتُب ف المَكْتَبات
باجْمَع جَوايز وشهادات
واسْمَع برافو (الله عليك)
إنْسان محَلّ التَقديرات
أخْلاق عظيمَه ومَظْهَرَك
بيقول حَقيقى انتا بن ناس
لكِنِّى شوف دِلْوقتِ إيه ؟؟
عاطِل ما باكسَبْشِ الجِنيه
طَبْ والسَبَب ؟؟
ماعرفشِ مين
كلّ اللى عارفُه انِّى باضِيِع
وبَقيت خَلااااااص إنْسان وَضِيع
كان كلّ أمَلِىِ يكون لى شأْن
ويفْتِخِر بِيَّا الجَميع
لكِنّها ظرُوف الحَياه
خَلَّتْنِىِ اشيخ قَبْل الأوان
طَبْ والعَمَل ؟؟
قول لى اعْمِل ايه ؟؟
تَعْليم وخَلَّصْت العَلام
أخْلاق وتَحْشَرْت الْتِزام
أحْلام بَقا الصَحَوان مَنام
من كُتْر حِلْمِىِ ف يوم اكُوُن
إنْسان جَدير بالاحْتِرام
والاحْتِرام مَعْناه فُلوس
تِمْلا الجُيوب
تِخْزِىِ العُيون
وتدارِىِ بيه كلّ العُيوب
بالمال يا صاحبى تنُول مُراد
وتعيش مِرَبَّع ف القُلوب
سامِع هِناك بِنْت الحَلال
بتقول حَنان القَلْب مال
والحُبّ يعْمِل مُعْجِزات
تاخدينى ياختى وتِفْطَرِىِ
وتتعَشِّى مَخْبوز الغَرام ؟؟
حتَّى انْ وافِقْتِىِ المُدَّه دِىِ
هاتدُوم يادُوب بكتيرُه عام
والإيد هاتِشْتاق للذَهَب
والفَقْر يُنْخُر ف العَصَب
والنَفْخَه من كُتْر الغَضَب
(من عيشتِىِ) ها تهِدّ الحِيطان
جَرَّبْت اصُوم زَىّ مَ قال
طَه الرَسول (الصُوم وِجاء)
بَسّ الوِجاء هايدُوم ل كام ؟؟
ليومين ؟؟ ثلاثَه ؟؟ شهور ؟؟ سَنَه ؟؟
ماهُو لِسَّا انا ... هِوَّاه أنا
نَفْس الظُروف ... نَفْس الضَنا
ولا جَدّ شيئ غير عُمْرِنا
فِ الدُنيا دِىِ بيْضِيع هَبَاء
