تعالى جنبى
عماد الشاعر
تعالى جنبى
اقعد على طرف السرير
يمكن يكون يومى الاخير
الزق ف جنبى
مرر حراره قوتك
تسرح ف تعبى
واسمع يا يوسف كلمتين
يا اغلى من نور العنين
ورثك كلام
شويه قصايد
وسيره حلوه
واحترام
على نن عينى
مسبتلكش
قصور
مفروشه
من ريش النعام
ولا ارض
تجرى تلات ليالى
لاجل ما تطول الزمام
ورثك كلام
ورثك
حبايب
هيراعوك
بعد اما اطول ف المنام
صحيح
ليهم على عتاب
غياب
وشويه ملام
لكنى صاين عهدهم
وقت التلاقى
والخصام
ورثك كلام
ورثك
علام
قضيت حياتى اعلمك
حب الوطن
ساعة الحروب
ووقت السلام
علمت قلبك يندفع
لاجل التراب
لاجل الشجر
لاجل الهوى
لاجل الحمام
علمت روحك
لاجل وطنك تنتفض
رغم المواجع
والالام
ورثك كلام
صعبان عليا
فرقتك
لمسه صوابعك
خطوتك
صعبان عليا
رقتك
ساعه تنام
ورثك كلام
صعبان عليا جمال عنيك
ساعه ما تزعل تتلوى
وساعة ما بحضن فيك اوى
وساعة ما تمشى
ماشيه مايعه
ومش تمام
ورثك كلام
قرب كمان
اخنس ف حضنى
ابعد بحبك
كل هم الدنيا عنى
وان كان ف جسمى
حته حلوه
خدها منى
وان جيت ف بالك
وف خيالك
ابقى زورنى
وسامحنى يا ابنى
لو اذيتك
من ميلادك للختام
وانى مسبتش
حاجه تنفع
الا حبى
وشويه كلام
