الرئيسية » » المدرسة | عمر الصاوي

المدرسة | عمر الصاوي

Written By Unknown on الثلاثاء، 23 يونيو 2015 | 6:10 م



المدرسة
.
مسحراتي في شارع المدرسه
قلبي رسا زي الطيور ع الغصن
شفت الفيونكه فراشة على ورده
وبنتي واخدة الكراسات بالحضن
.
بارك يا رب في عمر كتاكيتنا
ورد المحبة اللي ينوَّر بيتنا
.
ضرب الجرس
قالوا: بلادي بلادي
قلبي معاهم طار يقول النشيد
.
من فرحتي
أنا كنت حانسى ميعادي
والطبلة بتفكرني بالمواعيد
.
سمعت صوتهم لما نزلوا سوا
عصافير بتملا الفُسْحَه بالصوصوا
.
دقي معانا ياطبله ياطرمبطه
صوتك يصحصحنا في برد الشتا
على السطوح عصفوره متلفِّته
طيَّرها تاني مكرفون الإذاعه
كإنه فَزَّاعه..
دقي ياساعة.. قربي المرواح
.
وانا اللي يحلالي شقايا وتعبي
لما باغني معاكو ياحبايبي
أرجع صغير والزمن ينساني
وشعري الابيض يرجع اسود تاني
والشمس بتبدل معايا سناني
وابقى مكاني وإسمي ع السبوره
وأختي نوره تقوللي علِّمهاني
ألف وبه
وته وثه
وجيم وحا
والشمس نازله مروحه
.
بالطبله دقه وبقلبي دقة
ياللي سامعني ما تقولش لأ
.
قالوا العلام في الصغر أنا قلت والشيخوخه
دا انا مع ابني الصغير طبلتي ملبوخه
دا جيل جديد وجريء وشجاع وقلبه حديد
الدنيا حتلف بيه مش راح تجيله الدوخه
.
اصحى يانايم
رمضان كريم
.
(من ديوان المسحراتي 1987)
التعليقات
0 التعليقات

0 التعليقات:

إرسال تعليق

يتم التشغيل بواسطة Blogger.