ناقِشْت نفسى ف يوم
عَمَّال بتِكتِب ليه ؟؟
دا انتا حايالله يادوب
واحِد مابين مَلايين
مَغمُور فى قلْب الريف
زَىّ الدِيدان ف الطين
مَعقول يا (سى الغَلْبان)
هايسيبوا ناس مَشاهير
وهايقروا لَك أبْيات
لصاحِبها مُش عارفين ؟؟!!
أيْوا الكَلام موْزون
بَسّ اقرا للتانيين
هَتلاقى ناس جامدين
بيقولوا شِعْر طخين
عَنْدك فُلان وفُلان
بيقولوا شِعْر سمين
وبيكْتِبوا ف جُرْنال
ومجَلِّة ابْصَر مين
قوم انتا يا (ابن يومين)
يا اللى انتا مُش مَعْروف
حتَّى ل ولاد قَرْيِتَك
عَمَّال ترُصّ حروف
وعاوِزها تعْمِل صوت
وتغَيَّر اللى أُلوف
من كام سنه دايرين
بيحاولوا مُش قادرين
لا يغَيَّروا ف سلوك
ولا يعْدِلوا ف مَفاهيم ؟؟؟
رَدِّيت وقُلْت خَلاااااااااص
راح اطَلَّق الأوْراق
واكسَر سُنُون القَلَم
واقعُد وارَيَّح راس
عَمَّالَه بالأفْكار
تِشْغِىِ ف صَباح وف ليل
لكنِّى بعد يادُوب
ماعَزَمْت ب دققتين
دَوَّرت كالمَجْنون
وسألْت : يا ولاااااااااااااااااااااااد...... فين
فين الوَرَق والقَلَم
بيدُقّ راسى بيتين
ونسيت بإنِّى ناويت
على إنِّى اعيش إنْسان
مَيِّت لإنِّى ناويت
اقْعُد بدُون تَفْكير
وبدون ما اقُول لو بيت
بيشَجَّع التَغيير
