بَعْض البَنات مِسْتَعْجلين
يتْمَنُّوا يتقَدِّم عَريس
بالذات ف ريفنا اللى ماهُوُش
فاضِى ل شيئ غير الحَديث
عن بِنْت (س) جالها فُلان
عن بِنْت (ص) عانِس عَشان
متْعَنْطَظَه برَغْم انَّها
بتِلْبس من النُوع الرخيص
باعْرَف بنات لجْل المَلام
مِ الناس وخُوُفاً مِ الكَلام
بيوافقوا بالأصْل الخَسيس
واهُو كُلُّه ف الآخِر عَريس
ومفَكَّرين انّ الحَياه
هاتكُوُن كَئيبَه بدُوُن وَنِيِس
رَغْم الحَياه فيها الكتييييير
مِ الأُنْس من غير العَريس
واشْعَرَّفِك بانّ العَريس دا
ماهُوُش هاتِبقا حَياتُه طِيِن ؟؟
ويشَحْطَطِك ويلَوَّعِك
ويعَيِّشك عيشِة الضَنِين
فيه ناس كتير متجَوِّزين
وبيلْعَنُوا ف أُمّ الجَواز
ويقولوا كُنًًَّا ف بيت ابُونا
مرَيَّحين مِتْسَتِّتين
دِلْوَقتِ ف هموم العِيال
والعيشَه (شُوف) مِتْكَحْولين
مِ الفَجْر نِصْحا ... وطول نِهارنا
شوات ثِيران متْعَلَّقين
فى ساقيَه دايرَه ... وشوف وشوشنا
وشوف هُدومنا مبَهْدِلين
بعد الجِيبات والمِكياجات
والعَدَسَه مَلْزوقَه ف عينين
والعِطر بيجيب الشَباب
من بُعْد سِتَّه وسَبْعَه مِيِل
دِلوَقتِ وب ريحِة البَصَل
متْعَطَّرين (هِدْمَه) و(إيدين)
وتقولى مَلْهوفَه ل جَواز
يا اختِىِ اتْلِهِىِ وعيشى اليومين
********
(جاتِك الهَمّ ناس غاويَه مَرْمَطَه)
