حُكْم الوَرَق مايهِمِّناش
عبد الله الغلبان
حُكْم الوَرَق مايهِمِّناش
يا حَضْرِة القاضِىِ الجَليل
حُكْم الوَرَق مايهِمِّناش
ياجيش بيحْمِىِ المُشْ أصِيل
حُكْم الوَرَق مايهِمِّناش
ياشاشَه إعْلامها رَذِيل
حُكْم الوَرَق زَىّ الوَرَق
مَهْما القَلَم يكْتِب يشِيِل
لكِنّ قلْب الشَعْب دا
بيعْرَف أكِيد مين اللى خان
يعْرَف يفَرَّق بين رَئيس
اهْبَل و رَيِّس أُلْعوبان
والكُلّ عارِف من زَمان
مين اللى مَوِّت فِ الميدان
نَفْس اللى عَلِّمنا انّ لَجْل
تعيش ف أمْن تعيش جَبَان
نَفْس اللى خَلَّى دَوْلِتَك
ماشيَه ب دِماغ الأمْريكان
نَفْس اللى أوْجَد بالقانون
أرْفَع مَكان ل (ولاد سُوزان)
نَفْس اللى يوم مَ الشَعْب قال
ارْحَل زَرَع ف الجيش رِجال
تِحْمِيِه فِ سِجْن عَشان نقُول
العَدْل سايد ف البِلاد
نَفْس اللى مَوِّتنا بمَرَض
أصْبَح ميراث من جيل لجيل
هُوَّا اللى مَوِّت ف المِيدان
يا حَضْرِة القاضِىِ الجَليل
فَ تقول وَرَق ..... ؟؟!!!
ياما الوَرَق لَفَّق تُهَم
ياما بَريئ خَشّ السُجون
وبفَضْل تَزْويرَه بقَلَم
ياما طِلِع نَدْل وجَبان
هُوَّا الرَئيس المُنْتَخَب
لجْل انُّه بالقِوَّه امتَلَك
إعْلام رَديئ (حَبِّة رِمَمْ)
عَ الشاشَه دارين يمْدَحوا
ف شَعْب اتْفَضَح بين الأُمَم
عارفين سيادتك بالوَرق
أصْدَرْت حُكْمَك للعَلَن
بَسّ انتا حُكْمَك دَه يادُوُب
بالنِسْبَه لِىِ حِبْر ف وَرَق
مُش راح يغَيَّر أىّ شيئ
جِوَّايا من قَلْب اتْحَرَق
من نار مُبارَك والنِظام
اللى مازالِت روحُه فِيِه
وعَشان كِدا سيادتَك تقُوُل
ما تقول لايمُكْنِ هاسْتَجيب
