جايبين لى قال مَنْديل وَرَق
عبدالله الغلبان
جايبين لى قال مَنْديل وَرَق
ويقولوا جَفِّف دَمْعِتَك
فاكرين دُموعِىِ من العُيون
نِسيوا الفُؤاد اللى انْحَرَق
ساعِة ما ابويا هنااااااك قَعَد
جِوَّا المِيدان ............
طالِب سُقُوط الأُلعوبان
ونظام لِعَهْد الشَعْب خان
لكِنُّه ب رصاصَه اتْقَتَل
وف يومها سَمُّوه البَطَل
وبإسْمُه كُلّ الكُوُن هَتَف
ثَوْرِتنا صابِت للهَدَف
واللى ظَلَم شَعْبُه ونَتَف
ريشُه مابين قُضْبان وَقَفْ
ثلاث سِنين
والشَعْب صابِر عَ الأنين
مَحْكَمْتُه هاترُدّ الحُقوق
و اللى انْسَرَق هايعُوُد أكِيِد
واللى مشَرَّف فِ القَفَص
هاينُوُل جَزاءُه انْ شالله مِيِن
لكِنّ بَعْد النَكْبِتين
سَامحونِىِ (بَعْد الثَوْرِتين)
الأُولَىَ كات ضِدّ الطُغاه
والتانيه ضِدّ الطَمَّاعِين
والشَعْب ف الاثنين يادُوب
لِعْبَه ف إيدين المُجْرمين
دا اللى اتقَتَل هُمَّا الضُعاف
هُمَّا الغَلابَه المَطْحونين
هُمَّا اللى حلموا ف يوم يكُوُن
ليهُم وَطَن حُرّ ونظِيِف
مُش أرْض حاكمينها الضِباع
فيها الأصِيل الشَهْم ضَاع
واللى قَتَل ... واللى سَرَق
مَحْكَمْتُه سَمَّاتُه البَريئ !!!
واليوم بيُخْرُج مِ السُجُون
وكأنُّه ما أجْرَم ف شيئ
واحْنا اللى كُنَّا ولاد كِلاب
عَ الحُكْم قال مِتْمَرَّدِين
وجَناب سيادتَك جاى تقول
ليه الدُمُوع ماليَه العينين ؟؟
وجايبلى قال مَنْديل وَرَق
