لقيت بِرْواز على سَطْح العِمارَه قَديم
عبدالله الغلبان
لقيت بِرْواز على سَطْح العِمارَه قَديم
وفيه صورَه ما باعرفشِ الصورادى لمين
لِشاب يادوب ماهُوُش زايد عن العِشرين
أكيد كان شابّ زين جِدَّاً لأنُّه وَسيم
مَلامحُه تقول دا متْعَلِّم (مِعاه شِهادات)
ف وَقْت مَ كان بيتعِرِفوا بتوع التَعليم
تِلاقىِ الشابّ من دُوُلَتْ فِ لِبْسُه أنيق
مِسَرَّح شَعْرُه وملَمِّس عليه ب كِرِيم
نِظيف اللِّبْس ومهَنْدِم عليه طَرْبوش
وجِسْم وَقُوُر (ومَظْهَر دا انُّه ماشِى رَزين)
لا تِسْمَع مِنُّه صوت عالى امَّا ييجى يقول
ولا تِلْقاه بيتْصاحِب مع الصايعين
كِتابُه ف إيدُه وانْ حَبّ انّ يسْمَع شيئ
بيفْتَح راديوا وبيسْمَع لُه فيه آيتين
ولو فَنَّان وبيْحِبّ الفُنون تِلْقاه
بيسْمَع لَحْن بيْسَلْطَن كلامُه سِمِين
ولو يوم قَلْبُه دَقّ لحُبّ بِنْت يبان
عليه الحُبّ لَمَّا تشوفها فايتَه عليه
تقولشِ يا اخويا شاف حورِيَّه مِ الجَنَّات
وعَرْقان زَىَّ ما تقول انّ شاتيَه علِيِه
يحِبّ بكُلّ ما يَمْلُك من الإحْساس
لكنّ لسانُه متْلَجِّم بكِلْمِة عِيب
دِى زَىّ اُخْتِىِ وانا راجِل ولِيَّا اخْوات
بَنات واعْرَف بَنات الناس طَريقها منِين
مَسَكت الصورَه ف البِرْواز وبامْسَح فِيِه
وباضْرَب عينى ف الشارِع لقيت ماشيين
شَباب من حَيِّنا لكن يا مُحْتَرمين
مالوُش من وَصْف صورِتْنا ولا بمَلِّيم
باحِسّ بإيدى خَدِّينِىِ لقيت العين
بتِبْكِىِ بحُرْقَه وتقول اللى مَسْئول مين ؟؟
سُؤال واجابتُه بارْجوها من القُرَّاء
قُلولنا شَبابنا ليه أتْفَه من السابقين ؟؟
