كِلْمِة شاعِر كلْمَه كبيره
ووَصْف بنِوْصِف بيه حُكَماء
فَخْر انّ انتا ف يوم تِتْعَدّ
من القُرَّاء ضِمْن الشُعَراء
بيتَك يتسَجِّل ف كتاب
رأيَك يعْتِبِروه نِبْراس
وامَّا تموت أشْعارَك تِفْضَل
عايشَه وباقيَه ف ذِهْن الناس
واوْعا تفَكَّر بانّ الوَقت
اللى انتا بتِكتِب فيه بيضِيع
لأ واللهِ دا كلّ دقيقَه
بتِزْرَع ف المَخاليق إحْساس
وتعلِّمهُم بانّ الدُنيا
ماهيَّاش مَلْوْ بُطُون وخَلاص
بَسّ انا لِيَّا يادُوُب مَلْحوظَه
عَ اللى بيكْتِب شِعْر ... ياريت
لَمَّا تقول .... تِحْتِرِم القارِئ
وترَسِّيه إيه قَصْد البيت
ماتسيبهُوش يقرا وفِ الآخِر
يسأل إيه مَعْنَى اللى قَرِيت
خَلِّىِ الفِكْرَه بتاعتَك واضحَه
انْ شالله تكُوُن ف يادوبَك بيت
كُتْر اللَتّ وكُتْر العَجْن
بيجْعَل شِعْر الفَحْل هُراء
والقُرَّاء اليوم ف مَشاغِل
مُش فاضيين يُدْخُلوا أجْواء
فيها الحابِل ويَّا النابِل
مِتْشابهين كَ(الطَاء و التاء)
بَسَّط دايماً من أُسلوبَك
تُدْخُل جِوَّا قلوب مَلايين
عايشين جِوَّا حَياتنا الصَعْبَه
ومن مَشاغلهُم مُش قادرين
يلْقُوُا الوَقْت عَشان يقرولَك
شِعْر مجَعْلَص لَفْظُه طخين
