الو
عماد الشاعر
الو
ايوه انا رزه
ابن الملسوع
عاوز اكلم
شيخنا الملوى
ابن المفجوع
.
.
ايوه يا شيخنا
يا بركاتك
ياللى جهادنا
من حركاتك
- ايوه يا رزه
قول اتكلم
قول فهمنى
انا عايز افهم
كام واحد رميتوه بالنار ؟
كام عيل نسل الكفار ؟
دمرتوا لى
اليوم كام دار ؟
- بس استنى على يا شيخنا
احنا ف نايبه وانت كبيرنا
عايزين فتوى خير تساعدنا
- قول واسألنى
كل فتاوى الدين
من عندى
انت نسيتنى ؟
نسيت طول دقنى ؟
تيجى مترين
دا انا بتشنكل فيها ليلاتى
بعد ما بضرب لى
ازازتين
اسأل يلا
مين غيرى اولى
يفتى الناس
يبنى لقتل الخلق
اساس
- طبعا طبعا انت الاولى
دانت زعيم مش بس لدوله
دانت زعيم يجى خمسين دوله
شعبك كله خونه وجهله
رضعوا وضاعه
شربوا مذله
ياما خرربت بلاد وبلاد
ياما اعدمت بنات وولاد
ولولا خوفك من الحساد
كنت قتلت النور ف الشمس
كنت حرقت البوح والهمس
- خلص لخص
وقتى الغالى عمال ينقص
قول واسالنى
واسمع منى
- احنا يا شيخنا واحنا بنحرق
مش هتصدق
لقينا راجل وسط النار
طافح وشه عمار ووقار
وبيتبسم
نظره عينه
توجع تألم
خلى ضميرنا
يبدأ يندم
وطلع مسلم
ومش عارفين
راح نعمل ايه ؟
نحرق راجل مسلم ليه ؟
- انت يا رزه ضعيف الدين
هعرف احاسبك انا بعدين
اقتلوا كل اللى تقابلوه
وكل كلامه الحلو انسوه
- حاضر حاضر
هفضل دايما
خاين غادر
ويمكن اغامر
واقتل كل اصحابى ف الاخر
.
.
طاخ طاخ
- قولى يا رزه
انت قتلته ؟
- ايوه قتلته
- برافو عليك
..
