إضحك من قلبك | عصام السنوسي

Written By هشام الصباحي on الأحد، 26 أبريل 2015 | 11:05 م

إضحك من قلبك
جايز تفارق وشك للحظه
تكشيرة حزن متمكن منك بقى له سنين
أو تعاند حظك اللي معاندك وواخد في وشه
سهله الضحكه من القلب صدقني
جرب تنسى اللغه والعروض والتراث
والحريه والفقر والغربه والمرض
والكلام المنقي
وتسيب نفسك خالص
مع موجة المهرجانات والفضائيات
والثورات والخد وهات
وكل التجمعات اللي إنت فيها رقم
يمكن مالوش قيمه بس أكيد له وجود
وحق في رزق زي الدود
وصوت لازم يعلى ويجلجل
لما تضحك وتنكت وتتسهرى
قصاد الدار على المصطبه
وتحزن لما تبقى تلقى حد حزين