ياقريبه من الروح قوى | علي التمامي

الواد بيحبك حب جنان
وجنان الحب مابيخبيش
عنوان العاشق اى مكان
وحركاته ماليها الطيش
ماتختبريش فى يوم عاشق
فى عشقه بيشبه الدراويش
هيقدر يرسمك جواه
كما انتى ... فمتحاوليش
صباحك لسه فى عيونه
ونداكى وعطرك الفواح
بيسرى فى روحه من كلمه
ماتختبريش فى يوم عاشق
قدر إنه يجيبلك مــ السما نجمه
بتشبه أى شىء مسحور
ولما هتدعكى يطلع
ينور ليكى كل البور
يجنن فيكى وبعشقه
هيخلق كون عشانك بس
وقلبك حس ...
ماتختبريش فى يوم عاشق
رسم جسمه فى تفاصيلك
تنادى يلبّى ويجيلك
يزورك حتى فى الاحلام
يجيبلك علبه مقفوله
فتفتحى حضنها تلاقى
ورده صغيره نايمه
فتبتسمى ... وتترسمى
فى عينه بأحلى ضحكايه
تلاقى فى إيده وردايه
تمدى ايديكى تاخديها
تشميها ...
يفتّح حضنها ليكى
تلاقى الخاتم الفضه
فتتخضى ومن الخضه
بتتوضى من الفرحه
بدموعك وانتى مش قاصده
تصلى ركعتين لله
ويا الله ...
دا وانتى معاه
بتاكلى الشيبسى بالواحده
ولما بتوصلى اخره
بتتفاجئى...!!!
حاطتلك حاجه كات ضايعه
وجابلك حتى فى رمضان
فانوس عطشان...
لحضن عنيكى وايديكى فى ليل سرّاق
وبرضو لما قولتى فراق
وكان وياكى فى الشارع
أخد المحفظه منك
عشان بس انتى ماتمشيش
وماقدرتيش ...
فسابلك كيسه من ايده
رمالك فيها محفظتك
فتحتيها ..
لقيتى عروسه تشبهلك
ماتختبريش فى يوم عاشق
بيلبس ساعتك البايظه
وأكتر من دا ايه عايزه
سبب للضحكه على وشك
وروحه لسه بتحاول
تنول نظرة رضا منك
وجابلك ورد بيصالحك
ويوم ماتعبتى مات حزنا
ماتختبريش فى يوم عاشق
فراقك موته فعلا
سايبلك زكريات عايشه
ومواقف عمرها ماتموت
وسابلك بين ضلوعك قلب
لايوم هيبيع ولا ينساه
عشان ماقدرش ينساكى
وسابلك فى الشوارع ليل
ينادكى بعلو الصوت
وحافظ كل أسراره
وكل كلامه وياكى
ماتختبريش فى يوم عاشق
وانتى بتحكى يوم عنه
عنيكى بحس بتضمه
ويضحك دمعها معاكى
قدر إنه يعيش فيكى
وإسمه بس فى دعاكى
بتدعى يارب جمعنّا
بتتمنى ..ويتمنى
يعيش جواكى للأخر
فى حضن عنيكى من جوه
حاولى يوم كده تبادليه
مشاعر تشبه النوه
تلاقى الواد بقى ملكك
وإنتى بس آخر بنت
فى عينه من بنات حوه ..!!!
.