شو حلوة يا رفيقة..
و اللّيل مدّ جوانحو.. غنّالك الموّال
شتّت سمانا.. و نادت بإسمِك مطر
و بلّ الإسم ريقا
يا إسم.. من كتْر الحلا
سكران تا ناديه..
و صعب الإسم ينقال
يالـْ إسمِك مغرّق عطِر
يا معرّشة عالبال
شو بعيدة يا رفيقة..
بيناتنا -رغم القرب- ليلات شوق طوال..
* * *
ملّ الحكي.. و بحورنا نسيِت مراكبها
و كاسات من صبّ الوحي.. مين اللي ساكبها
و وراق يا رفيقة..
عبّيتن بكاسات من عمري
اصفرّ الورق.. و تْشردقِت كلْماتنا
و فاض الشّتي الخمري
عبّينا بجرار العواطف و القلق..
حبّات.. نقطفهاعن غْصان الشّجر
و نقلّها: اخْتِمري
شو صعب ما نسْكر..
شو صعبة يا رفيقة..
نشوف الدّني زهر و ربيع بأوّل العمر الطّري
و لْحالنا نكبر..
