الرئيسية » » الساقية | عمر الصاوي

الساقية | عمر الصاوي

Written By Unknown on الأحد، 12 يوليو 2015 | 4:17 م



الساقية

مسحراتي في نسيم الصيف 
نازل بلدنا لا غريب ولا ضيف 
يا ليل طويله عبايته ومجرجره 
.
الساقيه أم الريف
ومكنة الميه اللي طول الليل
لم بطلت تخريف
بتقول: سقيتك يا دره
.
والفلاحين بيمرجحوا الشواديف
بحكمه متقدّره
والدَّلو يعلى عشان يلف لورا
ويقول: سقيتك يا دره
.
الدلو يعلى من العشا للصبح
ويقول: سقيتك يا قمح
وادوْر عليك بالرَّقْيه والمبخره
.
يا دهب يا غالي
ياللي بحرك عالي
ما تخافش م النورج ولا الشرشره
.
حتى فى ليلة القدر
باصحى معاك الفجر
عمر الطيور ما بتصحى متأخره
.
بابعت سلامي وضحكتي على سنك
ما تفتكرشي قلبي شايل منك
لما تلاقي ميتي معكّره
.. .... .... .... .... ....
وانا اللي بالأمل الجميل ساعي
بين المراوي والنجوم العاليه
كل امّا اقول يا مصر يا غاليه
ألاقي عودي نما
يا ليل وقلبي انزرع
وسط الغيطان والترع
وبقاله جدر متين في أرض الحمى
وفرعه طال السما
.
بالطبله دقه وبقلبى دقه
ياللى سامعنى ما تقولش لأ
.
سألت نفسى وقلت: يا هلتَرى
عودي اللى أخضر ولا عود الدره
الاتنين سقانـا النيل بمـاء الأمل
ومصــر عـاوزانــا نطــوْل الــذُّرى
.
اصحى يا نايم
رمضان كريم
.
(من ديوان المسحراتي 1987)
التعليقات
0 التعليقات

0 التعليقات:

إرسال تعليق

يتم التشغيل بواسطة Blogger.