يالله نِعْمِل مليونِيَّه
عبد الله الغلبان
واللى يحْضَر مين ؟؟ ... مافيش
بَسّ نِثْبِت للجَميع
انّ البَلد دى ليها جيش
فيه أُسود تِقْدَر تِدافِع
تِمْلا وبسُرْعَه الشَوارِع
واللى بيكَلِّف ودافِع
شَعْب مُش قادِر يعيش
شَعْب مُش لاقِىِ الجِنِيه
والجُنود تِصْرِف أُلُوف
لجل مَ تجابِه إشاعَه
ولجْل فِ الإعْلام نِشوف
قائد الفِرْقَه الهُمام
والنُجوم فوق الكُتُوف
والمُوَظَّف فِ المَداين
خَدْ أوامِر رُوُح وطُوف
قُول بإنّ الدَمّ بُكرا
هايبقا سِيِل زَىّ البُحور
والذُقون راح تِرْمِى مُصْحَف
تحت رِجلين الجُنُود
يَعْنِىِ إيه ؟؟ ماتخافشِ
ظَهْرَك ساندُه هَيَّاب الأُسود
مَهْما طِلِعولنا بحُشودهُم
جِيشنا هايصَفِّىِ الحُشود
بالسِلاح مُش بالقانون
بُكرا مَعْرَكِة الوجود
والرِجال قالِت دا بُكْرا
الجُمعَه نُقْعُد فِ البُيوت
والحَريم رافعين إيديهُم
حَقَّىَ لو تِشْتِىِ عليهُم
والعِيال تِسْأل يا ماما
بتِدْعِىِ مين تِشْتِىِ علِيِه
والحَكاوِىِ تعِيد جَرايم
مُرْسى والخِرْفان يابِيِه
وامَّا شَمْس الجُمْعَه طِلِعِت
ييجِىِ ألْف سَرينَه ضَرَبِت
لَبِّشِت أعْصابنا .... جِرِيِت
بِنْتِىِ قالِت : يا با شُوُف
فيه عَساكِر ف الشوارِع
بَسّ مُش ماسكِيِن خَرُوف
قُمْت ضاحِك ... ليه بتِضْحَك ؟؟
قُلْت وَيَّا الليل نِشُوف
وانْتَظَرْنا
وعَدَّىَ يومنا
وفيه نُقَط فوق الحُرُوف
للى يعْرَف بَسّ يقْرا
ب عَقْلُه ويحَلِّل ظُرُوف
يلْقَا كلّ الشعب أصْبَح
باللى صار هُوَّا الخَرُوف
