الرئيسية » » بالشّام في ريحة عطر | علاء عودة

بالشّام في ريحة عطر | علاء عودة

Written By Unknown on الخميس، 25 يونيو 2015 | 2:59 ص

بالشّام في ريحة عطر.. بتجنّنك.. و تفوح
مخنوق شو؟؟
و القيمريّة كل مسا..
بتعمل لكل مجروح عم يمرق "قلب مفتوح"

بالقيمريّة.. في ملامح للأسى.. بضحكة
و حجار.. من كتر ال مرق عا راسها.. بتحكي
و مْطارحا.. للّي تِعِب.. ميّة هلا.. يركي
و وجوه.. معجونة بحزن.. بس ما فشر تبكي؟؟

بالقيمريّة.. في صبايا بتشبه دْوالي العنب.. عا موعد الصّرفة
و طْيور.. عم توقع على أشكالها.. و تلفي
شو بتشبه دْكاكين.. بتبيعك وقِت.. أحلى من الصّدفة
عَ حجار دربا.. بتسخى بالعمر الحلو.. و ما بتفرُق الكلفة

و الـ"قيمريّة".. مشغل "الأقمار"
ياما تِهِتْ.. و تغرّبِت.. و لقيت فيها دار
كلْ خطوة -شو إحكي؟- بِستّعشر ألِف مشوار..
فتنا قلال بدربها.. و طْلعنا منها كتار
و بْتعطي جنسيّة و وطن.. للّي إجوا زوّار

ياما تِقِل فينا القلب.. و تغبّرِت هالرّوح
فتنالها بهمّ و بكي.. طْلعنا بـ"قلب مفتوح"



التعليقات
0 التعليقات

0 التعليقات:

إرسال تعليق

يتم التشغيل بواسطة Blogger.