طه حسين
.
مسحراتي بطبل عاقل رزين
بانده على دكتورنا طه حسين
.
وكإني كنت معاه ليالي زمان
داخلين رُواق الجامع الأزهر
متعطرين بالمسك والعنبر
ومُجاوِرين حوالينا بيكبّروا
مع الأدان ..لما الأدان كبّر
.
وكإني شايف صاحبي طه حسين
رَيعان شباب شنب الرجال خضّر
قاعد وساند ضهره جنب العمود
قاعد بعيد مهموم.. وبيفكر
.
شاء العليم اللي طفا له البصر
يجعل في قلبه نور بيتفجّر
.
قالـوا مرضنا
الجهـل .. ولاّ
الفقر ..ولاّ
قال يا أجِلّه
الاتنين سوا
.
دكتورنا طه
بدر الأهلّه
فرش المصلى
النور تجلى
والجهل ولّى
لما نوى
.
يا ألف مدنه
علّي أدانك
الليل بيمشي
وانتي في مكانك
.
أدبنا جامعه
وانت العميد
والدنيا سامعه
صوت من بعيد
بيقول: يا هادى
أولاد ولادى
العلم ليهم
ميه وهوا
.
بالطبله دقه وبقلبى دقه
ياللي سامعني ما تقولش لأ
.
قاللي يا إبني
أشواك طريقي
قطيفه ناعمه
لا كنت تايه
ولا كنت أعمى
ديمها يا ربى
واحفظها نعمه
.
كان التاريخ عن حقنا ساهي
يا مصر ليكي الحق تتباهي
يا ألف رحمه يا عم طه حسين
.
وانـا اللـي دايـر فـي حـواري مصـر
مسحراتـي مـا خدعنــي الهـــوى
منقوش في قلبي من آيات الذكر:
{مــا ضـلَّ صاحبكــم ومـا غـــوى}
.
اصحى يا نايم
رمضان كريـــم
.
